Mount Everest | |
---|---|
D Nordsite vom Wääg zum Basislaager us gsee | |
Hechi | 8.848 m |
Lag | Nepal/China (Tibet) |
Gebirg | Himalaya |
Geografischi Lag | 27° 59′ 17″ N, 86° 55′ 31″ O |
Erschtbstygig | 29. Mai 1953 dur e Edmund Hillary und e Tenzing Norgay |
Normalweg | Südrute |
Virtuelle Flug um e Mount Everest |
Dr Mount Everest isch mit 8.848 m dr höggst Bärg uf dr Wält. Er isch äine vo de 14 Achtduusiger und as dr höggst Gipfel z Asie äine vo de Seven Summits. Dr Bärg isch zämme mit em übrige Himalaya-Gebirg entstande, wo die indischi mit dr eurasische Blatte zämmegstoosse isch. Si Naame chunnt vom britische Landvermässer George Everest. Uf Nepali häisst dr Bärg Sagarmatha (सागर-मथ्था, Sagarmāthā), uf Tibetisch Qomolangma (ཇོ་མོ་གླང་མ [t͡ɕʰòmòlɑ́ŋmɑ̀], lit. «Häiligi Mueter»), dütschi Usprooch „Tschomolangma“; änglischi Umschrift „Chomolungma“).
Dr Mount Everest liit im Mahalangur Himal in dr Region Khumbu z Nepal an dr Gränze zu China (Autonomes Gebiet Tibet); s westlig und südöstlig vo sine drei Gipfelgroot bilde d Gränze. Uf dr nepalesische Site isch er Däil vom Sagarmatha-Nationalpark, wo zum UNESCO-Wälterb ghöört. Uf dr Nordsite ghöört er zum „Qomolangma National Nature Reserve“, wo mit em Qomoalangma Biosfäärereserwaat korrespondiert.[1]
Im Edmund Hillary und em Tenzing Norgay isch s am 29. Mai 1953 as Erste glunge, dr „dritt Pol“ z bestiige. Am 8. Mai 1978 si dr Reinhold Messner und dr Peter Habeler as Ersti uf e Gipfel klätteret ooni zuesätzlige Suurstoff.